ნაღდი ამბავი კელი დეგნანის მხარდაჭერილი ვასილ ცოტაძის ბიოგრაფიიდან – ნინო მიქიაშვილი სპეციალურად „ჯორჯიან პრესისთვის“
ბიზნესმენ ვასილ ცოტაძეს 2004 წლის 12 თებერვლიდან იმავე წლის 5 ოქტომბრამდე ეკავა მადნეულის სამთო-გამამდიდრებელი კომბინატის დირექტორის თანამდებობა. უაღრესად საინტერესოა, თუ როგორ მოხვდა იგი ამ თანამდებობაზე, 19 წლის წინ.
ამჟამად ვასილ ცოტაძეს განზრახული აქვს მიწისქვეშა მანქანების სადგომის მშენებლობა ჭავჭავაძის გამზირზე, რასაც ადგილობრივი მოსახლეობას აქტიურად ეწინააღმდეგება. 28 აპრილს მოსახლეობასთან შეხვედრის დროს ცოტაძის მხარდასაჭერად მივიდა ამერიკის შეერთებული შტატების ელჩი საქართველოში კელი დეგნანი. სწორედ ამის შემდეგ გახდა აქტუალური ცოტაძის გვარი.
2004 წელს ვასილ ცოტაძეს მადნეულის დირექტორის სავარძელში ჩასასმელად ამერიკელი ცოლის დიპლომატიური კონტაქტები იყო საკმარისი, თუ მიხეილ სააკაშვილის იმჟამინდელი ცოლისა და ცოტაძის მეუღლის მეგობრობა, ამის დაზუსტებით თქმა არ შემიძლია. აქ, ამ სტატიაში თვითმხილველის ნაამბობს გთავაზობთ, იმაზე, თუ როგორ მიიყვანეს სააკაშვილის თანაგუნდელებმა ცოტაძე კაზრეთში,როგორ შეამტვრიეს დირექტორის კაბინეტი და როგორ ჩასვეს ცოტაძე დირექტორის სავარძელში.
გთავაზობთ ამონარიდს ინტერვიუდან ბატონ გივი ქოროღლიშვილთან, რომელიც 2000-დან 2003 წლის ჩათვლით იყო „მადნეულის” სამეთვალყურეო საბჭოს თავმჯდომარის მოადგილე (სახელმწიფოს წარმომადგენელი). მანამდე, წლების განმავლობაში ამავე საწარმოში სხვადასხვა თანამდებობაზე მუშაობდა. 2015 წელს ჩავწერე ინტერვიუ ბატონ გივისთან:
„საღამოს ხუთი საათი იყო, როცა ერთი მიკროავტობუსით ნიღბიანი, შეიარაღებული სპეცრაზმელები საწარმოს ადმინისტრაციის კორპუსში მოვიდნენ. ათმა-თხუთმეტმა სპეცრაზმელმა დაიკავა „სტრატეგიული” ადგილები – დადგნენ ლიფტთან დირექციის შესასვლელთან, სამეთვალყურეო საბჭოს თავმჯდომარის კაბინეტთან.
ამ სპეცრაზმელებს ახლდნენ: „ნაცმოძრაობის” ადგილობრივი წარმომადგენლები; ბოლნისის გამგებელი; პრეზიდენტის რწმუნებული ქვემო ქართლში ზურაბ მელიქიშვილი; ქვემო ქართლის პოლიციის უფროსი; ეკონომიკის მინისტრი; მერაბიშვილის მოადგილე; სახელმწიფო უშიშროების იმჟამინდელი მინისტრი ზურაბ ადეიშვილი. მე მათ გავეცანი. სხვებიც ასე მოიქცნენ. აღმასრულებელი დირექტორის კაბინეტში შევიდნენ და თან თქვეს, „ზედმეტი არაფერი გაბედოთ, სასამართლომ თქვენი მოთხოვნა არ დააკმაყოფილა, აგერ სამეთვალყურეო საბჭოს ახალი შემადგენლობაო”.
დირექტორთა საბჭოს თავმჯდომარის კაბინეტი ჩაკეტილი იყო და შეამტვრიეს. იქ შეიყვანეს და დასვეს ვასიკო ცოტაძე. ადეიშვილმა უთხრა – აგერ მაგიდა, აგერ კაბინეტი, ჩვენ წავედით, მიხედე საქმესო. სააკაშვილის ცოლი და ცოტაძის ამერიკელი ცოლი დაქალობდნენ. ცოტაძეს ვაკეში კაფე ჰქონდა და სააკაშვილი თვლიდა, რომ ცოტაძე კარგი მეწარმე იყო. როცა ჟვანია „მადნეულს” ხშირად ახსენებდა, სააკაშვილმა დირექტორად ცოტაძის დანიშვნა მოინდომა. ჟვანიას წინააღმდეგობა არ გაუწევია. სამაგიეროდ, სამეთვალყურეო საბჭოს სათავეში ჩაუდგა ჟვანიას ნდობით აღჭურვილი პირი – ვლადიმერ გუგუშვილი, რომელიც ოთხმოცდაათიან წლებში იყო გეოლოგიის, გეოდეზიისა და კარტოგრაფიის დეპარტამენტის დირექტორი. 2004 წლის შემოდგომაზე ცოტაძე გადააყენეს და დირექტორად კობა ნაყოფია მიიყვანეს“.