#ფოტოისტორია
გერონტი ქიქოძის ქუჩა (ყოფილი მახარაძე) თბილისის ისტორიულ უბანში, სოლოლაკში მდებარეობს, თავისუფლების მოედნის მახლობლად. ამ უბნის განაშენიანება XIX ს-ის შუა ხანებში დაიწყო. მანამდე აქ მეფეთა და წარჩინებულთა სანახები და ბაღები იყო. XIX ს-ის ბოლოსა და XX ს-ის პირველ ნახევარში სოლოლაკში ძირითადად ბურჟუაზიული საზოგადოება ცხოვრობდა. ამან განაპირობა უბნის არქიტექტურული სახეც. აქ უმთავრესად რუსულ-ევროპული სტილის შენობებს ნახავთ, რომელთაც ტიპიურად თბილისური სახლები ენაცვლება. გ. ქიქოძის ქუჩაზე ძირითადად ძველი განაშენიანებაა შემონახული.
განსაკუთრებით ღირებულია # 4, ადრეული ვაჟთა, შემდგომ 39-ე საშუალო და 1972 წლიდან მე-3 ექსპერიმენტალური, ამჟამინდელი 50-ე საჯარო სკოლის შენობა. ორსართულიანი სახლი განაპირა რიზალიტითა და ორსართულად განლაგებული აივნებით XX ს-ის დასაწყისშია აშენებული.
ფასადის ნაძერწი ყვავილოვანი ფრიზი, ქალის თავის რელიეფური გამოსახულებები და სხვა ელემენტები მოდერნის სტილის ნიშნებს ავლენს. მოდერნის დეკორია გამოყენებული ეზოსკენა ფასადისა და ინტერიერის გაფორმებაშიც.
ბევრს უსაუბრია თბილისი 50-ე (საჯარო/საშუალო) სკოლის უნიკალობაზე, მარგამ არ უთქვამთ, რომ ეს პირველი ქართული სკოლა იყო… დიახ, პირველი ქართული სასწავლებელი, რომლის დირექტორიც ერთ დროს ექვთიმე თაყაიშვილი იყო და სადაც იაკობ გოგებაშვილი მუშაობდა. პირველად მისი დაარსებისა და გახსნის შესახებ ჟურნალ “ივერიის” 1879 წლის ნომერში დაიწერა.
