“ყველა გაბითურებულ აბიტურიენტს ვულოცავ დღევანდელ დღეს.
დღეს თქვენ პირველი მნიშვნელოვანი ცხოვრებისეული გაკვეთილი მიიღეთ და უკვე იცით როგორი გემო აქვს მარცხს; გვარიანად მლაშე და მწარე. თუ დიდხანს შეინარჩუნებთ ამ გემოს, მერე ნელნელა მიეჩვევით და აღარ შეგაწუხებთ; ამიტომ არ მიეჩვიოთ; სჯობს რომ გაწუხებდეთ. ეგ იქნება თქვენი ერთერთი მთავარი მოტივაცია მარცხის გამარჯვებით შესაცვლელად.
მარცხი არ არის საშიში, თუ გონივრულად მოეპყრობით. მარცხისგან ბევრი რამის სწავლა შეიძლება. მარცხს შეუძლია ძალიან წარმატებულ და ძალიან კარგ ადამიანებად გაქციოთ; მაგრამ თუ მარცხს არასწორად გაიგებთ, დაითრგუნებით, წახდებით და განადგურდებით.
მთავარია იმაზე დაფიქრდეთ, რატომ დამარცხდით. თუ დაფიქრდებით, შეგიძლიათ მშვიდად იყოთ, საკმარისი ინტელექტი გქონიათ და ეგ უკვე კარგი საბაზისო ინვესტიციაა, რომელზეც გამარჯვების აშენება შეიძლება.
ფიქრი აუცილებელია, მაგრამ ნუ იქნებით პასიურად მოფიქრალნი. იმოქმედეთ და ისე იფიქრეთ. არ შეგეშინდეთ შეცდომების დაშვების; თუ მოძრაობაში იქნებით, სწრაფად გამოასწორებთ. არ გაიყინოთ შიშისაგან და სასოწარკვეთისაგან. გახსოვდეთ, მარცხში უზარმაზარი ენერგიაა და თუ ამ ენერგიის გამოთავისუფლებას შეძლებთ, ყველა მწვერვალზე ახვალთ.
წარმატებით გევლოთ!” – წერს სოციალურ ქსელში ამერიკაში მოღვაწე, ქართველი ექიმი, ზურაბ გურული.