ბოდიში, ძმაო, უშნოდ გამომივიდა, ბოდიშს ვიხდი კაცურად, ქართულად და სახელმწიფოებრივად -ალეკო ელისაშვილი მამუკა ხაზარაძეს
ბოდიში, ძმაო, უშნოდ გამომივიდა, ბოდიშს ვიხდი კაცურად, ქართულად და სახელმწიფოებრივად, – ასე მიმართა „ძლიერი საქართველოსთვის“ წევრმა, ალეკო ელისაშვილმა შემაჯამებელ საარჩევნო ღონისძიებაზე მამუკა ხაზარაძეს.
ელისაშვილის თქმით, „ძლიერ საქართველოში“არის იმიტომ, რომ ემსახურება საქართველოს.
„ჩემი ნატვრა იყო, რომ გავმხდარიყავი ოფიცერი. ჩემს ოჯახს უჭირდა, ისევე როგორც ყველა ოჯახს და მაშინ პირველი პრაგმატული გადაწყვეტილება მივიღე, რომ უნდა დამეწყო მუშაობა მეორე კურსიდან, რათა ოჯახს შევხიდებოდი, ვალები ერთად გაგვესტუმრებინა. ამიტომ ვერ გავხდი სამხედრო, მაგრამ გულის სიღრმეშიც და ტვინშიც ვარ ამ ქვეყნის ჯარისკაცი. რა თქმა უნდა, ბევრი რაღაც მეშლება, ბევრი რამ შემეშალა, აგერ პირველად ვეუბნები მამუკას ბოდიშს. მისთვის ბოდიში არ მომიხდია. ბოდიში, ძმაო, უშნოდ გამომივიდა ძალიან. მაგრად მშხამავს ის ეთერი, იმის ნახვა არ მინდა. „ქოცებმა“, იცოცხლე, ატრიალეს და ატრიალეს. ბოდიშს ვიხდი კაცურად, ქართულად და სახელმწიფოებრივად იმ ეთერისთვის. აქ, „ძლიერ საქართველოში“ ვდგავარ, რადგან ვემსახურები საქართველოს, ჩვენ ვემსახურებით საქართველოს ერთ მუშტად შეკრული“, – განაცხადა ელისაშვილმა.
თავის მხრივ, ალეკო ელისაშვილს მიმართა მამუკა ხაზარაძემაც: „ალეკო, დიდი მადლობა და ჩემგანაც მიიღე ბოდიში. მეგობრებო, ბოდიში ყოველთვის ორმხრივია“.
გარდა ამისა, ელისაშვილმა წინასაარჩევნო კამპანიის ფარგლებში გამართულ შემაჯამებელ ღონისძიებაზე მოქმედი ხელისუფლების შეუსრულებელ დაპირებებზე ისაუბრა და აღნიშნა, რომ კოალიცია “ძლიერი საქართველო” ერთ მუშტად შეკრული მოემსახურება ქვეყანას.
“12 წლის წინ ყველას ყელში გვქონდა ამოსული ის ძალადობა, რაც ხდებოდა წინა ხელისუფლების დროს, განსაკუთრებით ბოლო წლებში. არ გვინდოდა, იმ ჩაგვრას შევგუებოდით და მაშინ გამოჩნდა ის კაცი. გამოჩნდა და მხსნელი გვეგონა. უფასო ფულზე ტაში რამ მაკვრევინა, ვერ მომინელებია. ჩემს თავს ვეუბნებოდი, შე ოხერო, კითხვა როგორ ვერ დასვი, ფული და უფასო ვის გაუგიაო?!. ას ქარხანას დავუკარი მხურვალედ ტაში, ხუთი მილიონი თითო სოფელსო და მაგასაც ვუკარი ტაში… სოლარიუმი თითო სოფელსო – მაგაზეც რამ მაკვრევინა ტაში…
სამჯერ მოვიყვანეთ ხელისუფლებაში, სამჯერვე მოგვატყუა. ყველაფერი ჰქონდა, რომ შეესრულებინა, აბსოლუტური ძალაუფლება და შესაძლებლობა, ყველა სოფელში “ქართული ოცნება” იყო ხელისუფლებაში. რატომ არ შეასრულა, იცით? არ ვადარდებთ და იმიტომ, ადამიანებად არ მივაჩნივართ, ელექტორალური რესურსი ვართ. ესეც არ გვაკმარა, იმდენად არაფრად მივაჩნივართ, გამოვიდა და თქვა, რომ პირველი ეკონომიკა გვაქვს მსოფლიოშიო. შეურაცხყოფას გვაყენებს. დაცლილია სოფლები, გული გაგისკდება, რომ შეხედო ეკალ-ბარდებად ქცეულ ეზოებს, ჩამტვრეულ შუშებს, ჩამონგრეულ სახლებს. ნახევარი საქართველო გადახვეწილია ლუკმა-პურის საშოვნელად, სხვების მოხუცების მოსავლელად. ამის ფონზე იმდენად არაფრად მივაჩნივართ, გვატყუებს, ყველა დავასაქმეო, 700 ქარხანა მუშაობსო, უფასო ფულიც დავარიგეო. დაარიგა, აბა რა ქნა – ხუნდაძე რომ ჰყავს, 1 ლარად მისცა ასი ათასიანი ქონება, უფასოა მისთვის, აბა რა არის.
ესეც არ გვაკმარა, გორში, დაბომბილ და აწიოკებულ ქალაქში დადგა და ჩვენი ქვეყნის მტრებს, ხალხი რომ სახლებიდან გამოგვიყარა და დაგვიხოცა, იმ ადამიანებს ბოდიში მოუხადა.
მიიღო ისეთი კანონი, რომლითაც ქვეყანას პერსპექტივას უსპობს და ერთადერთი გაახარა რუსები იმიტომ, რომ მათ უქიცინებს კუდს.
🔵ჩემი ნატვრა იყო, რომ გავმხდარიყავი სამხედრო. ჩემს ოჯახს უჭირდა, ისევე, როგორც ყველა ოჯახს და მეორე კურსიდან დავიწყე მუშაობა, რომ ოჯახს შევხიდებოდი, ამიტომ ვერ გავხდი სამხედრო, მაგრამ ვარ ამ ქვეყნის ჯარისკაცი. რა თქმა უნდა, ბევრი რამ მეშლება და აი, პირველად მინდა მოვუხადო მამუკა ხაზარაძეს ბოდიში, არ მომიხდია მანამდე ბოდიში – ბოდიში, ძმაო, უშნოდ გამომივიდა ძალიან. ბოდიშს ვიხდი კაცურად, ქართულად და სახელმწიფოებრივად. აქ, “ძლიერ საქართველოში” ვდგავარ იმიტომ, რომ ვემსახურები საქართველოს, ჩვენ ვემსახურებით საქართველოს ერთ მუშტად შეკრულები”, – განაცხადა ელისაშვილმა თავის გამოსვლაში.
