ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყვნენ გადაწყვეტილების მიღების ცენტრში, ნათლად ამბობენ, რომ სააკაშვილი მოატყუეს, მისი პროვოცირება მოახდინეს და აიძულეს ჯარები სამხრეთ ოსეთში შეეყვანა, – ამის შესახებ უკრაინის პრეზიდენტის აპარატის ყოფილმა მრჩეველმა, ალექსეი არესტოვიჩმა რუს ჟურნალისტთან, იულია ლატინინასთან ინტერვიუში განაცხადა.
ჟურნალისტმა არსეტოვიჩს ჰკითხა: „როგორ მოხვდა პუტინი აშშ-ს სატყუარაზე? როგორ იყო ეს საქართველოსთან დაკავშირებით? სააკაშვილი ხომ მზად იყო პუტინთან მოლაპარაკებისთვის, მას მშვენივრად ესმოდა, რომ საქართველო არ იყო რუსეთის ბუფერული სახელმწიფო, უზარმაზარ პრობლემებს განიცდიდა და მზად იყო ყველასთან მოლაპარაკებისთვის. თუმცა პუტინის რეალური დამოკიდებულება საქართველოს მიმართ, როგორც ჩანს, მას არ ესმოდა. ის რეალურად ფიქრობდა, რომ ეს უნდა იყოს პროვინცია, რომელიც კოცნის მას ფეხზე. ვინ უნდა ყოფილიყავი, რომ უკრაინას პროვინციასავით მოქცეოდი, მიგეყვანა საქმე ომამდე და ჩავარდნილიყავი ამერიკულ ტყუილში?“.
არესტოვიჩის თქმით, „მანიპულირებულმა მონაცემებმა და შეფასებებმა განაპირობა, რომ საქართველომ დაარტყა სამხრეთ ოსეთს“.
„ჩემი შეფასება პუტინზე და მის პოლიტიკაზე არ ემთხვევა თქვენს შეფასებას. რაც შეეხება საქართველოს, მე ვიცნობ ხალხს, ვინც პირდაპირ იყვნენ გადაწყვეტილების მიღების ცენტრში 2008 წლის ომამდე. ეს ყველაფერი სააკაშვილთან დაკავშირებით ძალიან ძლიერად ჰგავს იმ სქემას, რაც გამოყენებული იყო უკრაინასთან მიმართებით. ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყვნენ გადაწყვეტილების მიღების ცენტრში, ნათლად ამბობენ, რომ სააკაშვილი მოატყუეს, მისი პროვოცირება მოახდინეს და აიძულეს, ჯარები სამხრეთ ოსეთში შეეყვანა. შეკითხვაზე, ვინ მოატყუა, ზოგიერთი ამბობს, რომ ეს რუსეთმა გააკეთა. ამ ხალხს კი სხვა მოსაზრება აქვს, რომ არა იმდენად რუსეთიდან, არამედ უკრაინის მსგავსი ტექნოლოგიის გამოყენებით. მანიპულირებულმა მონაცემებმა, შეფასებებმა განაპირობა, რომ საქართველომ დაარტყა სამხრეთ ოსეთს. ამ პროვოკაციაში არა მხოლოდ რუსეთის პასუხისმგებლობაა. იყო თუ არა რუსული ჯარები გვირაბთან ომის დასაწყებად, ეს დიდი შეკითხვაა. იქ ტყუილის ელემენტები იყო, ისევე, როგორც ახლა არის კორეელებზე ორივე მხრიდან, სააკაშვილმა კი თავს უფლება მისცა ამაში ჩავარდნილიყო, ამაში თითქმის დარწმუნებული ვარ. ვისთვის, როგორ და რა პროპორციით გამოვიდა, ამაზე დავა დიდხანს შეიძლება, თუმცა ეს იყო კლასიკური პროვოკაცია, ვერძის საბრძოლველად გაყვანა“, – განაცხადა არესტოვიჩმა.
1tv.ge
