მამუკა ხაზარაძის ოჯახმა მხოლოდ მას შემდეგ მოგვმართა, რაც ჯერ მედიაში გავრცელდა ინფორმაცია ხელშეკრულების არარსებობის თაობაზე, ხოლო შემდეგ დაიწყო საკითხის მოკვლევა, – ამის შესახებ შემოსავლების სამსახურის განცხადებაშია ნათქვამი.
უწყების თქმით, სიცრუეა ხაზარაძის და მისი თანაპარტიელების განცხადება, თითქოს მათ აღმოაჩინეს „ტექნიკური გაუგებრობა“ და თავადვე მოახდინეს ბიუჯეტის წინაშე არსებული დავალიანების ანგარიშსწორება.
„მაღალი საზოგადოებრივი ინტერესის გათვალისწინებით, გვსურს კიდევ ერთხელ გამოვეხმაუროთ მამუკა ხაზარაძის ოჯახსა და გერმანიის ფედერაციული რესპუბლიკის საელჩოს შორის არსებულ საიჯარო ურთიერთობას, რომლის მოკვლევასაც შემოსავლების სამსახური აწარმოებს.
ხაზგასმით აღვნიშნავთ, რომ სიცრუეა ხაზარაძის და მისი თანაპარტიელების განცხადება, თითქოს მათ აღმოაჩინეს „ტექნიკური გაუგებრობა“ და თავადვე მოახდინეს ბიუჯეტის წინაშე არსებული დავალიანების ანგარიშსწორება.
მამუკა ხაზარაძის ოჯახმა მხოლოდ მას შემდეგ მიმართა შემოსავლების სამსახურს საგადასახადო დეკლარაციების მოთხოვნით, რაც ჯერ მედიაში გავრცელდა ინფორმაცია მხარეებს შორის ხელშეკრულების არარსებობის თაობაზე, ხოლო შემდეგ შემოსავლების სამსახურმა დაიწყო საკითხის მოკვლევა.
ამ დროისთვის შემოსავლების სამსახურის მიერ, საკითხის სრულყოფილად შესწავლის მიზნით გამოთხოვილია დოკუმენტაცია მათ შორის ხაზარაძის ოჯახისგან, ასევე გამოთხოვილია ინფორმაცია ნოტარიუსთა პალატისგან და საჯარო რეესტრიდან, რათა დადგინდეს, რეალურად არსებობდა თუ არა მხარეებს შორის ხელშეკრულება.
ამასთანავე, შემოსავლების სამსახურს ხაზარაძის ოჯახის მხრიდან გამოთხოვილი აქვს საბანკო ჩარიცხვების დამადასტურებელი დოკუმენტაცია, რათა დადგინდეს, რეალურად რა ოდენობის შემოსავალი აქვს მიღებული გერმანიის ფედერაციული რესპუბლიკისგან ხაზარაძის ოჯახს, რათა შემდგომში დადგინდეს ბიუჯეტთან ანგარიშსწორების შესაბამისობა.
შემოსავლების სამსახური მოუწოდებს მამუკა ხაზარაძის ოჯახს, ითანამშრომლოს უწყებასთან და დროულად წარმოადგინოს ყველა ის დოკუმენტაცია, რაც აუცილებელია საკითხის სრულყოფილად შესწავლისთვის“, – ნათქვამია შემოსავლების სამსახურის განცხადებაში.
ცნობისთვის, შემოსავლების სამსახურმა მამუკა ხაზარაძის ოჯახის საკუთრებაში არსებული უძრავი ქონების გერმანიის ელჩისთვის იჯარით გაცემის საკითხთან დაკავშირებით 4 აგვისტოს განცხადება გაავრცელა. როგორც განცხადებაშია აღნიშნული, საკითხის ანალიზისას გამოვლინდა შესაძლო საგადასახადო კანონდარღვევა, რის გამოც შემოსავლების სამსახურმა ფაქტების მოკვლევა დაიწყო.
მოგვიანებით მამუკა ხაზარაძემ სოციალურ ქსელში პოსტი გამოაქვეყნა და განაცხადა, რომ „პიტერ ფიშერთან გაფორმებულ ქირავნობის ხელშეკრულებაზე აღმოჩენილ იქნა ბიუჯეტში გადასახადის საკითხი“ და ამ დროისთვის თანხა სრულად გასტუმრებულია.
