ბათუმში, დედის მიერ დაშავებული ახალშობილი გარდაიცვალა. ოფიციალური განცხადება რამდენიმე წუთის წინ სამედიცინო ჯანმრთელობის ცენტრმა “მედინამ” გაავრცელა, სადაც ურთულესი დაზიანებებით, ჩვილს რამდენიმე კვირის განმავლობაში მკურნალობდნენ.
“დიდი გულისტკივილით გაცნობებთ, რომ მიუხედავად ექიმების მრავალდღიანი ინტენსიური ბრძოლისა და განხორციელებული ყველა შესაძლო სამედიცინო ღონისძიებისა, 23 თებერვალს, ირის ბორჩაშვილის ჯანმრთელობის ცენტრ “მედინაში” დაბადებული ახალშობილი (ჩვენი კლინიკის თანამშრომლის შვილი) ამ დილით გარდაიცვალა.
კლინიკის გუნდი პირველივე წუთებიდან მოქმედებდა უმაღლესი პროფესიული სტანდარტების დაცვით. პროცესში ჩართული იყვნენ როგორც ჩვენი კლინიკის, ისე მოწვეული მრავალპროფილური სპეციალისტები. პაციენტს ჩაუტარდა არაერთი გადაუდებელი და მაღალკვალიფიციური სამედიცინო ჩარევა, თუმცა მისი მდგომარეობა თავიდანვე იყო უკიდურესად მძიმე.
ამ მძიმე პერიოდში ჩვენი მთავარი საზრუნავი იყო და რჩება პაციენტების სიცოცხლისა და ჯანმრთელობის დაცვა.
ვიზიარებთ მომხდარით გამოწვეულ ღრმა ტკივილს და თანავუგრძნობთ ყველა იმ ადამიანს, ვისთვისაც ეს ტრაგედია მძიმე დანაკარგია”, – აღნიშნულია განცხადებაში.
ინფორმაციისთვის: მომხდართან დაკავშირებით გამოძიება შინაგან საქმეთა სამინისტრომ თავიდანვე დაიწყო. საქმე აღძრულია საქართველოს სისხლის სამართლის კოდექსის შესაბამისი მუხლით, რაც ოჯახის წევრის მიმართ ჩადენილ ჯანმრთელობის განზრახ მძიმე დაზიანებას გულისხმობდა, თუმცა ახალშობილის გარდაცვალების შემდეგ, სავარაუდოდ, მოხდება მუხლის გადაკვალიფიცირება.