ორგანიზაცია “ამრა” დაურ ბუავას გარდაცვალებასთან დაკავშირებით განცხადებას ავრცელებს
აფხაზი ბლოგერისა და ახალგაზრდული ორგანიზაცია „ამრას“ თანადამფუძნებლის, დაურ ბუავას გარდაცვალების ფაქტთან დაკავშირებით, ორგანიზაციამ ოფიციალური განცხადება გავრცელა.
“ამრა”, ოჯახის წევრები და მეგობრები ღრმა მწუხარებას გამოთქვამენ და საზოგადოებას მოუწოდებენ, თავი შეიკავონ გადაუმოწმებელი ცნობების გავრცელებისგან:
„გარდაცვალების მიზეზი შესაბამისი პროცედურების დასრულების შემდეგ გახდება ცნობილი. მანამდე გთხოვთ, თავი შეიკავოთ გადაუმოწმებელი ინფორმაციის გავრცელებისგან და პატივი სცეთ გარდაცვლილის ოჯახის პირად სივრცეს.
დაურ ბუავა იყო ახალგაზრდა ადამიანი, რომელიც სიმართლისთვის იბრძოდა და საკუთარი პრინციპების დასაცავად, სირთულეებისა და შესაძლო რისკების მიუხედავად, ბოლომდე იდგა. სწორედ ასეთად — პატიოსან, მამაც და თავისი საქმის ერთგულ ადამიანად — დარჩება იგი სამუდამოდ მისი ახლობლების, მეგობრებისა და საზოგადოების მეხსიერებაში“, — ნათქვამია განცხადებაში.
მოვლენების ქრონოლოგია:
30 წლის აფხაზი ბლოგერი თბილისში, საკუთარ საცხოვრებელ ბინაში გარდაცვლილი იპოვეს.
ადგილობრივების თქმით, მეზობლებმა ბუავა ბოლოს რამდენიმე დღის წინ ნახეს. კორპუსში გაჩენილი გაუსაძლისი სუნის გამო, ადგილზე სამაშველო სამსახური და პოლიცია გამოიძახეს. სათვალთვალო კამერების ჩანაწერების მიხედვით, ბუავა 23 აგვისტოს შემდეგ სახლიდან არ გასულა. მეზობლები ვარაუდობენ, რომ იგი 4 დღის გარდაცვლილია.
როგორც შინაგან საქმეთა სამინისტროში აცხადებენ, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. გარდაცვალების ზუსტი მიზეზი ექსპერტიზის შემდეგ გახდება ცნობილი.