30 სექტემბრის მონაცემებით, ყარაბაღი ასი ათასამდე პირმა დატოვა.
ინფორმაციას სომხეთის პრემიერ-მინისტრის პრესმდივანი ნაზელი ბაგდასარიანი ავრცელებს.
მისი თქმით, აღნიშნულმა პირები უკვე სომხეთში იმყოფებიან და საცხოვრებლის არარსებობის შემთხვევაში სომხეთის ხელისუფლება მათ თავშესაფრით უზრუნველყოფს.
მისივე ინფორმაციით, ბოლო დღეების მანძილზე მთიანი ყარაბაღიდან სომხეთში 21 000-მე მეტი სატრანსპორტო საშუალება შევიდა.
მანამდე სომხეთის პრემიერ-მინისტრმა, ნიკოლ ფაშინიანმა მოსახლეობის მიერ ტერიტორიის დატოვების მიზეზად აზერბაიჯანის მხრიდან ეთნიკური წმენდის პოლიტიკა დაასახელა.
შემდგომში აზერბაიჯანის საგარეო საქმეთა სამინისტრომ უარყო ფაშინიანის ბრალდებები, რომ ხელისუფლება ეთნიკურ წმენდას ახორციელებდა და მოუწოდა სომეხი ეროვნების მოქალაქეებს, არ დაეტოვებინათ ყარაბაღი.
ოფიციალური ინფორმაციით, მთიან ყარაბაღში 120 ათასი ადამიანი ცხოვრობდა. არაღიარებული მთიანი ყარაბაღის რესპუბლიკის ე.წ. „პრეზიდენტმა“ სამველ შახრამანიანმა ხელი მოაწერა განკარგულებას, რომლის თანახმადაც ე.წ. „რესპუბლიკა” 2024 წლის 1-ელი იანვრიდან შეწყვეტს არსებობას.
