ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ისრაელი ღაზაში ცეცხლს არ შეწყვეტს. „ახლა არის დრო ომისა“, – თქვა მან სიტყვით გამოსვლისას.
ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელისთვის ცეცხლის შეწყვეტის შესახებ მოწოდება, „ჰამასისთვის“ დანებების მოწოდების ტოლფასია.
„როგორც აშშ არ დათანხმდა ცეცხლის შეწყვეტას პერლ ჰარბორის დაბომბვის ან 11 სექტემბრის ტერაქტის შემდეგ, ისე ისრაელი არ დათანხმდება საომარი მოქმედებების შეწყვეტას „ჰამასთან“ 7 ოქტომბრის საშინელი თავდასხმების შემდეგ“, – განაცხადა ნეთანიაჰუმ.
„მოწოდებები ცეცხლის შეწყვეტის შესახებ არის მოწოდება ისრაელისადმი, დანებდეს „ჰამასს“, დანებდეს ტერორიზმს. ბიბლია ამბობს: „არის დრო მშვიდობისა და დრო ომისა, ახლა არის დრო ომისა. ომი ჩვენი საერთო მომავლისთვისაა. დღეს ჩვენ ვავლებთ ზღვარს ცივილიზაციისა და ბარბაროსობის ძალებს შორის“.- აღნიშნა ნეთანიაჰუმ.
შეგახსენებთ, რომ 7 ოქტომბერს, ღაზის სექტორიდან ისრაელზე მოულოდნელი სარაკეტო და სახმელეთო თავდასხმა განხორციელდა. თავდასხმაზე პასუხისმგებლობა ტერორისტულმა დაჯგუფება „ჰამასმა“ აიღო. თავის მხრივ, სარაკეტო იერიშის საპასუხოდ, ისრაელის თავდაცვის სამინისტრომ ქვეყანაში საომარი მდგომარეობა გამოაცხადა.
