აშშ-თან შეთანხმებული მემორანდუმი ირანის 14-პუნქტიან წინადადებას ეფუძნება – ამის შესახებ ინფორმაციას ტელეკომპანია CNN-ი ირანის სახელმწიფო საინფორმაციო სააგენტო IRNA-ზე დაყრდნობით ავრცელებს.
მედიამ დოკუმენტის სავარაუდო შინაარსი და მთავარი პუნქტები გაასაჯაროვა.
გავრცელებული ინფორმაციით, დოკუმენტი მოიცავს შემდეგ ფუნდამენტურ საკითხებს:
- ომის დასრულება ყველა ფრონტზე: შეთანხმება ითვალისწინებს საომარი მოქმედებების შეწყვეტას ყველა მიმართულებით, მათ შორის ლიბანში. კერძოდ, ვაშინგტონი იღებს ვალდებულებას, „ისრაელს აიძულოს”, ბეირუთში სამხედრო ოპერაციები შეაჩეროს.
- ბირთვული პროგრამა: თეირანი ახალ ვალდებულებებს დაუყოვნებლივ არ აიღებს. ბირთვულ საკითხზე მოლაპარაკებები ხელმოწერიდან 60 დღის ვადაში დაიწყება „ფუნდამენტური პრინციპების ფარგლებში”, რაც ირანისთვის ურანის გამდიდრების უფლების შენარჩუნებას გულისხმობს.
- კონტროლი ჰორმუზის სრუტეზე: ირანი სრუტის მართვაზე კონტროლის დათმობას არ აპირებს. მემორანდუმში საუბარია მხოლოდ „საზღვაო მიმოსვლის ნორმალიზებასა” და აშშ-ის მიერ დაწესებული ბლოკადის მოხსნაზე. სრუტის მართვა რეგიონულ დონეზე კოორდინირდება, რაშიც აშშ მონაწილეობას არ მიიღებს.
- 24 მილიარდი დოლარის განბლოკვა: ფინანსურ ნაწილში თეირანი გაყინული აქტივებიდან 24 მილიარდი დოლარის განბლოკვას ითხოვს, რომლის ნახევარიც ხელმოწერისთანავე უნდა გახდეს ხელმისაწვდომი. სააგენტოს ცნობით, ირანმა გადახდასთან დაკავშირებით „მესამე მხარეებისგან კონკრეტული გარანტიები” უკვე მიიღო.
- სანქციების მოხსნა და ახალი ძალები: ირანი ითხოვს ყველა შეზღუდვის მოხსნას 60 დღის განმავლობაში. ამ პერიოდში აშშ ასევე იღებს ვალდებულებას, რეგიონში ახალი სამხედრო ძალები არ განათავსოს და ირანს ახალი სანქციები არ დაუწესოს.
- ზარალის ანაზღაურება: მემორანდუმის ერთ-ერთი პუნქტია სამხედრო მოქმედებებით გამოწვეული ზარალის ანაზღაურება, რომლის განხორციელების კონკრეტული მექანიზმი 60-დღიანი მოლაპარაკებების პერიოდში შემუშავდება.
აღსანიშნავია, რომ ირანული მედიის ცნობით, ირანის სარაკეტო პროგრამისა და რეგიონში მისი მოკავშირე დაჯგუფებების საკითხები დოკუმენტიდან „საბოლოოდ ამოიღეს”.