ოპოზიციაში ხვდებიან, რომ მათი პოლიტიკა აბსოლუტურად წარუმატებელი, აბსურდული და დამაზიანებელი იყო, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.
ირაკლი ქადაგიშვილი დარწმუნებულია, რომ ადგილობრივი თვითმმართველობის არჩევნებში მონაწილეობის გადაწყვეტილებას, მამუკა ხაზარაძესთან ერთად, თითქმის ყველა მიიღებს.
„ხვდებიან, რომ მათი პოლიტიკა აბსოლუტურად წარუმატებელი, აბსურდული და დამაზიანებელი იყო. რა მოუტანა პარლამენტის ბოიკოტმა, საკუთარი ამომრჩევლის ნების უგულებელყოფამ, ქვეყნის კონსტიტუციის მდგრადობის შელახვის მცდელობამ – არაფერი კარგი. მათ მიერ განვლილი გზა არის აბსოლუტურად უპერსპექტივო, ამიტომ, ბუნებრივია, ახლა შიგნით დაიწყება ამაზე ღიად საუბარი. დარწმუნებული ვარ, არა მარტო ხაზარაძე, არამედ ოპოზიციაში თითქმის ყველა საბოლოოდ მიიღებს გადაწყვეტილებას, მიიღოს მონაწილეობა ადგილობრივი თვითმმართველობის არჩევნებში. გარედანაც უთხრეს, რევოლუციების თავი თქვენ არ გაქვთო და საერთოდ რომ არ გაქრეთ პოლიტიკური ველიდან, იქნებ ადგილობრივი თვითმმართველობის არჩევნებში მიიღოთ მონაწილეობაო“, – განაცხადა ირაკლი ქადაგიშვილმა.
მისი თქმით, შედეგები იქნება ისეთივე, როგორიც იყო საპარლამენტო არჩევნების შემდეგ – „ქართული ოცნება“ დამაჯერებლად გაიმარჯვებს დედაქალაქში და სხვა მუნიციპალიტეტებშიც.
„ფაქტია, რომ შიდა კონკურენცია არსებობს. მიუხედავად იმისა, რომ გარედან ხდება კორექტირება და მართვა, შიდა კონკურენცია მაინც არსებობს. რაც დრო გადის, მით უფრო ნათელი ხდება, რომ „ნაციონალური მოძრაობის“ პერსპექტივა ნულის ტოლია. უნდა აღინიშნოს, რომ არც ამ პარტიებს, რომლებიც, პრინციპში, „ნაციონალური მოძრაობის“ ორბიტაზე იყვნენ და კოლექტიური „ნაციონალური მოძრაობა“ ერქვათ, არც მათ აქვთ დიდი შანსი, რომ „ქართული ოცნების“ რაიმე სახის რეალური ალტერნატივა გახდნენ“, – განაცხადა ირაკლი ქადაგიშვილმა.
