მონაკოს სამთავროში, საფრანგეთის საზღვართან მდებარე ერთ-ერთ პრესტიჟულ საცხოვრებელ კორპუსში, მძლავრი აფეთქება მოხდა. შემთხვევის შედეგად მძიმე დაზიანებები მიიღო წარმოშობით უკრაინელმა მულტიმილიონერმა, დნიპროელმა ბიზნესმენმა ვადიმ ერმოლაევმა, მისმა მეუღლემ და 13 წლის შვილმა.
როგორც სააგენტო Le Figaro იტყობინება, ადგილობრივი სამართალდამცველები და უსაფრთხოების სამსახურები მომხდარს მიზანმიმართულ ტერორისტულ თავდასხმად აფასებენ.
„ეს, სავარაუდოდ, ტერორისტული აქტია. რამდენადაც ჩემთვის ცნობილია, ეს პირველი მსგავსი შემთხვევაა სამთავროს უახლეს ისტორიაში“, — განაცხადა მონაკოს სახელმწიფო მინისტრმა, კრისტოფ მირმანმა.
ზურგჩანთაში დამალული ბომბი და თავდამსხმელი
გამოძიების პირველადი ვერსიით, აფეთქება იმ დროს მოხდა, როდესაც შენობის სადარბაზოში ადამიანები შედიოდნენ. უსაფრთხოების კამერების ჩანაწერებში დაფიქსირდა მუქი ფერის ქუდიანი პირი, რომელმაც ასაფეთქებელი მოწყობილობით (სავარაუდოდ, ამანათი-ბომბით) აღჭურვილი ზურგჩანთა კორპუსის შესასვლელთან დატოვა და ფეხით სწრაფად მიიმალა საფრანგეთის მიმართულებით.
ფრანგული მედიის ინფორმაციით, ვადიმ ერმოლაევი და მისი მეუღლე კრიტიკულ მდგომარეობაში, რეანიმაციულ განყოფილებაში იმყოფებიან.
აფეთქების ტალღამ ასევე ნამსხვრევებით მსუბუქად დააზიანა კიდევ ოთხი მოქალაქე, რომლებიც საავადმყოფოში გადაიყვანეს. სამართალდამცველები ამ ეტაპზე ინტენსიურად იძიებენ, იყო თუ არა თავდასხმის მთავარი სამიზნე უშუალოდ უკრაინელი მილიონერის ოჯახი.
ვინ არის ვადიმ ერმოლაევი?
ვადიმ ერმოლაევი უკრაინის ერთ-ერთი უმდიდრესი ბიზნესმენი და მსხვილი დეველოპერია, რომელიც წლების განმავლობაში კორპორაცია „ალეფს“ ხელმძღვანელობდა. როგორც ბრიტანული გამოცემა The Telegraph წერს, ერმოლაევი 2023 წლის დეკემბრიდან ოფიციალური კიევის მიერ სანქცირებულ პირთა სიაში იმყოფება
უკრაინის უსაფრთხოების სამსახურის (СБУ) ინფორმაციით, სანქციების დაწესების მიზეზი გახდა მისი ფართომასშტაბიანი ალკოჰოლური ბიზნესი ანექსირებულ ყირიმში, სადაც მისი კომპანიები ფუნქციონირებდნენ და მილიონობით გადასახადს პირდაპირ რუსეთის ფედერაციის ბიუჯეტში იხდიდნენ.
სანქციების დაწესების შემდეგ უკრაინელმა ოლიგარქმა საცხოვრებლად მონაკოს სამთავროს მიაშურა. უკრაინის საგარეო საქმეთა სამინისტრო მონაკოს ხელისუფლებასთან მუდმივ კონტაქტზეა მომხდარი აფეთქების დეტალების დასაზუსტებლად