მსურს გაგაცნოთ აჭარის ავტონომიური რესპუბლიკის 2025 წლის ბიუჯეტით დაგეგმილი სოციალური და ინფრასტრუქტურული პროექტები, რომელიც მორგებული და გათვლილია აჭარის თითოეული მცხოვრებლის საჭიროებებზე, მათ კეთილდღეობაზე. თამამად შემიძლია ვთქვა, რომ ამ მიზნით და სულისკვეთებით ვხელმძღვანელობდით აქამდე და დარწმუნებული ვარ, რომ 26 ოქტომბრის გამარჯვების შემდეგ ახალი შემართებით გავაგრძელებთ ამ მნიშვნელოვანი საქმეების კეთებას, – ამის შესახებ აჭარის მთავრობის თავმჯდომარემ თორნიკე რიჟვაძემ, გამართულ მთავრობის სხდომაზე განაცხადა.
მან რეგიონში წინასაარჩევნო გარემოზე ისაუბრა და ხაზი ეუთო/ოდირის მიერ გამოქვეყნებულ შუალედურ დასკვნას გაუსვა, რომლის მიხედვითაც დადებითად არის შეფასებული წინასაარჩევნო გარემო როგორც მთლიანად ქვეყანაში, ისე აჭარის რეგიონში.
„მინდა კომენტარი გავაკეთო მათ შორის კოლექტიური „ნაცმოძრაობის“ სატელიტ პარტიებზე: ჩვენმა მოსახლეობამ აჭარაში, ჩვენმა ძვირფასმა ხალხმა ძალიან კარგად იცის, რომ სააკაშვილის, „ნაცმოძრაობის“ მთავარი რეკეტი გახლდათ ხაზარაძე, რომელსაც უკავშირდება არაერთო ოჯახის გაუბედურება აჭარაში, არამარტო ცალკეული ოჯახების, არამედ მთლიანი გვარების გაუბედურება, მათი გაკულაკება და წარმოუდგენელია, რომ ქობულეთში, ბათუმში ამ პარტიამ, რომელიც შეხმატკბილებულია „ნაცმოძრაობასთან“, მიაღწიოს საარჩევნო ბარიერს. ჩვენ ამ წინასაარჩევნო გარემოში გავაგრძელებთ ჩვენს მოქალაქეებთან, ამომრჩევლებთან აქტიურ კომუნიკაციას როგორც მთლიანად გუნდი, ისე ჩვენი ძალიან ღირსეული დელეგატები. დარწმუნებული ვარ, რომ 26 ოქტომბერს კიდევ ერთხელ სწორედ მშვიდობის, ღირსების და რა თქმა უნდა, ჩვენი მოქალაქეების კეთილდღეობის გათვალისწინებით შევძლებთ, რომ წინ ვიაროთ ევროპული სახელმწიფოსკენ“, – განაცხადა თორნიკე რიჟვაძემ.
