საპროტესტო აქციების დროს ჯგუფურ ძალადობაში მონაწილეობის ბრალდებით დაკავებული მსახიობი ანდრო ჭიჭინაძე, იუმორისტი ონისე ცხადაძე და კიდევ ცხრა პირი თბილისის საქალაქო სასამართლომ პატიმრობაში დატოვა.
დღევანდელ პროცესზე დაკავებულების მიმართ აღკევთის ღონისძიების სახით შეფარდებული პატიმრობა გადაისინჯა და ძალაში დარჩა.
პროცესზე დაცვის მხარემ აღკვეთის შეცვლის შუამდგომლობები დააყენა. ადვოკატები მოსამართლეს სთავაზობდნენ გირაოს სხვადასხვა ოდენობით, ასევე, თავდებობას. დაკავებულების ნაწილი ბრალს არ აღიარებს, ნაწილი დუმილის უფლებას იყენებს.
ამასთან, პროცესზე სიტყვის უფლებით ისარგებლეს დაკავებულებმა – ანდრო ჭიჭინაძემ, ონისე ცხადაძემ და რეზო კიკნაძემ.
დაკავებულებს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს. აღნიშნული დანაშაული 4-დან 6 წლამდე თავისუფლების აღკვეთას ითვალისწინებს.
თბილისის საქალაქო სასამართლოში სხდომა დილიდან მიმდინარეობდა.
