“მთავარი არხი”, “ტვ პირველი” და “ფორმულა” უარს ამბობენ “ქართული ოცნების” საარჩევნო ვიდეორგოლების ეთერში განთავსებაზე

“მთავარმა არხმა”, “ტვ პირველმა” და “ფორმულამ” გაავრცელეს ერთობლივი განცხადება, რომლითაც ცნობილი გახდა, რომ სამივე ტელევიზია უარს ამბობს, ეთერში გაუშვან “ქართული ოცნების” ვიდეორგოლები, რომლებშიც გამოყენებულია უკრაინაში ომის შედეგად არსებული ვითარების ამსახველი კადრები. განცხადებაში აღნიშნულია, რომ მიუხედავად მოსალოდნელი მძიმე ჯარიმებისა, კრიტიკული არხები არ აპირებენ ხელი შეუწყონ “ქართული ოცნების” რუსულ პროპაგანდას და უკრაინელი ხალხის დაცინვას. ისინი უარს ამბობენ ამორალური ბანერების ეთერში გაშვებაზე, რომლებიც “ქართულ ოცნებას” ქუჩებში, ბილბორდებზე აქვს გამოფენილი. “მთავარი არხის”, “ტვ-პირველისა” და “ფორმულას” ერთობლივი განცხადება: “ქართული ოცნება” აგრძელებს საკუთარი პოლიტიკური კამპანიისთვის უკრაინელი ხალხის ტრაგედიით სპეკულირებას და ახლა უკვე ტელევიზიებისგან მოითხოვს იმ ამორალური ბანერების ეთერში გაშვებას, რომლებიც ქუჩებში, ბილბორდებზე აქვს გამოფენილი. ივანიშვილის კუთვნილი ხელისუფლება გვაყენებს დილემის წინაშე – ან დავუთმოთ ეთერი ზემოაღნიშნულ ვიდეორგოლებს, ან დაგვეკისრება დიდძალი ჯარიმები, რაც, შესაძლოა, არხების საქმიანობის შეჩერების საფრთხემდეც მივიდეს. მიუხედავად იმისა, რომ ხელისუფლებისგან დაკისრებული დაუსრულებელი ჯარიმები კრიტიკული არხებისთვის მძიმე ტვირთია, ჩვენ მაინც არ ვაპირებთ, თუნდაც ირიბად, ხელი შევუწყოთ “ქართული ოცნების” რუსულ პროპაგანდას და უკრაინელი ხალხის დაცინვას. ჩვენ სრულად ვიზიარებთ ევროკავშირის ელჩის შეფასებას, რომ ეს არის “აღმაშფოთებელი, სამარცხვინო და შემზარავი” კამპანია და, შესაბამისად, უარს ვამბობთ ამ ვიდეორგოლების ეთერში განთავსებაზე. მივმართავთ საერთაშორისო საზოგადოებას, დასავლეთის დიპლომატიურ წარმომადგენლობებს, სამოქალაქო ორგანიზაციებსა და სახალხო დამცველს, დააფიქსირონ სათანადო რეაქცია “ქართული ოცნების” ქმედებაზე და მხარში დაგვიდგნენ კრიტიკულ არხებს ამ პრინციპულ საკითხში, რომელიც ცდება პოლიტიკური გემოვნების ჩარჩოებს და სახელმწიფოებრივი თავმოყვარეობის თემას წარმოადგენს”- ნათქვამია განცხადებაში. განცხადებას გამოეხმაურა არასამთავრობო ორგანიზაცია „საქართველოს ევროპული ორბიტის” აღმასრულებელი დირექტორი, ნინო ლომჯარია და ტელევიზიებს გვერდში დგომა აღუთქვა. „მადლობა ამ ღირსეული პოზიციისთვის! თქვენ გვერდით ვართ!” – წერს ლომჯარია სოციალურ ქსელში.Nino Lomjaria Formula • ფორმულა TV Pirveli • ტელეკომპანია პირველი მთავარი არხი • Mtavari Arkhi მადლობა ამ ღირსეული პოზიციისთვის! თქვენ გვერდით ვართ!