უკრაინის კონტრშეტევის იმედები არ გამართლდა, მაგრამ ეს არ ნიშნავს, რომ გამარჯვება ჩვენს მხარეს არ იქნება, – ამის შესახებ უკრაინის ეროვნული თავდაცვის და უსაფრთხოების საბჭოს მდივანი, ალექსეი დანილოვი BBC-სთან ინტერვიუში აცხადებს.
უკრაინის ეროვნული უსაფრთხოებისა და თავდაცვის საბჭოს მდივანი, ფრონტის ხაზზე შექმნილ სიტუაციას აფასებს როგორც „ძალიან რთულ და მძიმეს“.
დანილოვის განცხადებით, „ასეთი ომი არ ყოფილა არც XX საუკუნეში და მეტად არ იქნება არც XXI-ში.
მისი თქმით, ძველი სამხედრო სახელმძღვანელოები, მათ შორის ნატოს სახელმძღვანელოებიც, უკვე არქივში უნდა ჩაბარდეს, ისინი პრაქტიკულად გამოუსადეგრები გახდნენ.
„მაისში ჩვენს ქვეყანაში ყველა მოქალაქეს სურდა ომის სწრაფად დასრულება. იმედები იყო, მაგრამ არ გამართლდა. ის, რომ ორი წელია, ჩვენს ქვეყანას ვიცავთ, უკვე დიდი გამარჯვებაა. დარწმუნებით შემიძლია ვთქვა, რომ არ გავჩერდებით. ჩვენ გავაგრძელებთ ბრძოლას ჩვენი თავისუფლებისთვის, ჩვენი დამოუკიდებლობისთვის“, – განაცხადა ალექსეი დანილოვმა.
უკრაინის უსაფრთხოების საბჭოს ხელმძღვანელმა ასევე უარყო ცნობები პრეზიდენტ ვოლოდიმირ ზელენსკისა და უკრაინის მთავარსარდალ ვალერი ზალუჟნის შორის დაძაბულობის შესახებ.
„მე არ ვადასტურებ, რომ მსგავსი რამ, რაც დღეს მედიაში ვრცელდება, რეალურია“, – განაცხადა ალექსეი დანილოვმა.
