დასრულდება ეს არჩევნები, დასრულდება ომი უკრაინაში და გადაიტვირთება ურთიერთობები ევროკავშირთან. რაც შეეხება საქართველოსა და მოლდოვის შედარებას, ეს არის შეურაცხმყოფელი, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.
კობახიძის თქმით, საქართველო მოლდოვას არაერთი მიმართულებით უსწრებს, მათ შორის ეკონომიკური თვალსაზრისით.
„საქართველო წინ უსწრებს მოლდოვას ყველა პარამეტრით, იქნება ეს ადამიანის უფლებები, ეკონომიკა თუ სხვა. ცხრა მილიარდით გავზარდეთ ეკონომიკური კუთხით სხვაობა მოლდოვასთან, რაც არის იმის დამსახურება, რომ ჩვენ, მოლდოვისგან განსხვავებით, გვაქვს ძალიან ძლიერი ინსტიტუტები. რაც შეეხება დემოკრატიას და ადამიანის უფლებებს, მოლდოვაში აიკრძალა პოლიტიკური პარტიები, მედიასაშუალებები და დარჩა რეალურად ორი მედიასაშუალება, ეს არის საზოგადოებრივი მაუწყებლის პირველი არხი და მეორე არხი. აღარ არსებობს პოლიტიკური პლურალიზმი, მედიაპლურალიზმი. როცა გადარებენ ასეთ ქვეყანას და თან ნეგატიურ კონტექსტში, ეს არის თვალში ნაცრის შეყრა. თუმცა ეს ვერ დააზიანებს ჩვენს ქვეყანას. დასრულდება არჩევნები, დასრულდება ომი უკრაინაში და აუცილებლად გადაიტვირთება ევროკავშირთან ურთიერთობები“, – განაცხადა კობახიძემ.
ევროკავშირის საგარეო პოლიტიკური უწყების ხელმძღვანელმა, ჯოზეფ ბორელმა ევროკავშირის საგარეო საქმეთა მინისტერიალის შემდეგ გამართულ პრესკონფერენციაზე განაცხადა: „დაველოდოთ საპარლამენტო არჩევნებს, რომელიც გადამწყვეტი ტესტი იქნება საქართველოს დემოკრატიისა და ევროკავშირისკენ მიმავალი გზისთვის“. ჯოზეფ ბორელმა ასევე აღნიშნა: „ჩვენ ვაფასებთ მოლდოვის მთავრობის გამძლეობას უპრეცედენტო გამოწვევების წინაშე და განვაგრძობთ მხარდაჭერას. საქართველოში უარესი სურათია“.
