ბალდის კანიონთან მშენებლობის საწინააღმდეგო მოძრაობის ერთ-ერთი წევრი ინდიკო ბჟალავა გირაოს სანაცვლოდ გაათავისუფლეს.
ამის შესახებ ინფორმაციას მოძროაბა „ბალდის კანიონის შესანარჩუნებლად“ ავრცელებს.
„ინდიკო ბჟალავა თავისუფალია! 98- დღიანი უსამართლო პატიმრობის შემდეგ, სასამართლომ ინდიკოს წინასწარი პატიმრობა გირაოთი შეცვალა! ეს გამარჯვება ჩვენი გრძელვადიანი ბრძოლისა და შეუპოვრობის დამსახურებაა“, – წერს მოძრაობა სოციალურ ქსელში.
„ინდიკო ბჟალავა უდანაშაულოა და ის თავს არ ცნობს დამნაშავედ. მიუხედავად ამისა, დღეს ამ გადაწყვეტილებას არ ველოდებოდით. შემდეგ სხდომაზე უნდა დამდგარიყო ეს საკითხი… მოსამართლემ ჩათვალა, რომ საქმეში არ იყო საკმარისი მტკიცებულებები და გარემოებები ინდიკო ბჟალავასთვის ასეთი მაქსიმალურად მკაცრი სასჯელის გასაგრძელებლად, რომ ის დარჩენილიყო პატიმრობაში. ამიტომ გირაოს სანაცვლოდ ის სასამართლო დარბაზიდან გაათავისუფლეს“, – აცხადებს მოძრაობა “ბალდის კანიონის შესანარჩუნებლად” წევრი ცოტნე თვარაძე.
მარტვილის მუნიციპალიტეტის სოფელ ბალდის კანიონზე ტურისტული ინფრასტრუქტურის მშენებლობის ერთ-ერთი მოწინააღმდეგე ინდიკო ბჟალავა პოლიციამ მუქარის ბრალდებით 12 ივნისს დააკავა.
მარტვილის მუნიციპალიტეტის სოფელ ბალდის კანიონთან, სადაც ტურისტული ინფრასტრუქტურის მშენებლობის წინააღმდეგ გასული წლიდან დაწყებული საპროტესტო აქციის მონაწილეთა კარავია გაშლილი, 11 ივნისის ღამეს, ბალდაში, მშენებლობის მოწინააღმდეგეთა კარავში თავდასხმა მოხდა.
შემთხვევის შედეგად დაჭრეს ძმები, ბალდის მცხოვრებლები მინდია და არჩილ ბჟალავები, რომლებიც მშენებლობის მოწინააღმდეგეთა შორის არიან. მომხდარი ფაქტის გამო დაკავებული არიან ბალდაში მცხოვრები ძმები გელა და გიგა ხურცილავები, რომლებსაც საპირისპირო პოზიცია აქვთ. პროკურატურამ ბრალი 2 თავდამსხმელს და 1 აქტივისტს წარუდგინა. გამოძიება ამბობს, რომ მარტვილის სოფელ ბალდაში კანიონის მშენებლობასთან დაკავშირებით წარმოქმნილი უთანხმოების გამო, ინდიკო ბჟალავამ გელა ხურცილავას მეუღლეს სიტყვიერი შეურაცხყოფა მიაყენა და სიცოცხლის მოსპობით დაემუქრა.
ამ ბრალდებას უარყოფენ როგორც თავად ბრალდებული, ასევე მისი ოჯახის წევრები და მეგობრები. ისინი ირწმუნებიან, რომ ინდიკო ბჟალავას სიცოცხლის მოსპობის მუქარას აბრალებს სამშენებლო სამუშაოების ჩატარების მომხრე თანასოფლელი ქალი. მათი განმარტებით, ბჟალავას 11 ივნისს დილის საათებში თავად გამოელაპარაკა სოფო შავყულაშვილი და პროვოკაციის მოწყობა სცადა.
ინდიკო ბჟალავას ბრალდება სსკ-ის 151-ე მუხლის პირველი ნაწილით (მუქარა) წარუდგინეს, რაც 1 წლამდე თავისუფლების აღკვეთას ითვალისწინებს.
ინდიკო ბჟალავას მორიგი სასამართლო პროცესი სენაკის რაიონულ სასამართლოში 3 ოქტომბერს ჩაინიშნა.
