საქართველოს საპატრიარქოში დღეს გაიმართება წმინდა სინოდის სხდომა, სადაც კათოლიკოს-პატრიარქობის სამი კანდიდატი შეირჩევა.
სხდომა 12:00 საათზე დაიწყება და მასში მონაწილე მღვდელმთავრები საპატრიარქო კანდიდატებს დაასახელებენ.
კათოლიკოს-პატრიარქობის კანდიდატი უნდა აკმაყოფილებდეს გარკვეულ მოთხოვნებს: უნდა იყოს ეროვნებით ქართველი, საქართველოს მართლმადიდებელი ეკლესიის მღვდელმთავარი, ჰქონდეს საღვთისმეტყველო განათლება და ეკლესიის მართვის გამოცდილება. ასევე, მისი ასაკი უნდა იყოს არანაკლებ 40 და არაუმეტეს 70 წლისა და უნდა იყოს ბერი.
სინოდის თითოეულ წევრს უფლება აქვს, წარადგინოს ერთი კანდიდატი, მათ შორის საკუთარი კანდიდატურაც.
სამი მღვდელმთავარი, რომელიც ხმათა უმრავლესობას მიიღებს, მონაწილეობას მიიღებს გაფართოებულ კრებაში, სადაც საბოლოოდ შეირჩევა სრულიად საქართველოს კათოლიკოს-პატრიარქი.
თუ პირველ კენჭისყრაში ვერცერთი კანდიდატი ვერ მოიპოვებს ხმათა ნახევარზე მეტს, გაიმართება მეორე ტური, რომელშიც მონაწილეობას მიიღებენ ორი საუკეთესო შედეგის მქონე კანდიდატი.
გაფართოებულ კრებაზე ხმის მიცემის უფლება მხოლოდ მღვდელმთავრებს ექნებათ, ხოლო არჩეულად ჩაითვლება კანდიდატი, რომელიც ხმების ნახევარზე მეტს მიიღებს.
აღსანიშნავია, რომ კრება უნდა გაიმართოს პატრიარქის გარდაცვალებიდან 40 დღის შემდეგ, თუმცა არაუგვიანეს ორი თვისა. კრების თარიღს სინოდი დღევანდელ სხდომაზე განსაზღვრავს.