მეთიუ კრუქსს, რომელმაც ქალაქ ბატლერში დონალდ ტრამპს ესროლა, მობილურ ტელეფონში 45-ე პრეზიდენტის დონალდ ტრამპის, მოქმედი პრეზიდენტის, ჯო ბაიდენის და სხვა ოფიციალური პირების, მათ შორის გენერალური პროკურორის, მერიკ გარლანდისა და FBI-ს დირექტორის, კრის რეის ფოტოები ჰქონდა, – ამის შესახებ Associated Press წერს.
ანონიმური წყაროს ინფორმაციით, გამომძიებლებმა ასევე დაადგინეს, რომ 20 წლის კრუქსი ინტერნეტში ეძებდა დემოკრატიული პარტიის ეროვნული ყრილობის თარიღებს, ისევე როგორც ტრამპის გამოჩენის თარიღს.
ამასთან, მათივე თქმით, გამოძიებას ჯერჯერობით მოტივის დადგენის კუთხით წინსვლა არ აქვს.
„ასოშიეთიდ პრესი“ წერს, რომ მსროლელი ასევე ეძებდა ინფორმაციას დეპრესიული აშლილობის შესახებ, მაგრამ გამომძიებლებს ჯერ არ დაუდგენიათ, ჰქონდა თუ არა მეთიუ კრუქსს აშლილობა.
ამასთან, როგორც მედია წერს, კვლევებმა აჩვენა, რომ ფსიქიკური დაავადებების მქონე ადამიანების აბსოლუტური უმრავლესობა არ არის მოძალადე და ექსპერტები ამბობენ, რომ მოძალადე ადამიანების უმეტესობას არ აქვს ფსიქიკური დაავადებები.
მედიაში გავრცელებული ინფორმაციით, სამართალდამცველებმა კრუქსი ტრამპის გამოსვლამდე ცოტა ხნით ადრე შენიშნეს, რომელიც მიიწევდა მიტინგზე დიდი ზურგჩანთით და ათვალიერებდა სცენის უკან მდებარე სახურავებს, თუმცა პოლიციამ საეჭვო პირი ხალხში დაკარგა.
