დაცული ტერიტორიების სააგენტომ ბიზნეს პლატფორმებზე საინფორმაციო კამპანია დაიწყო. მიზანი “ეკოტურიზმის” მნიშვნელობის გაყალბება და ბუნების კომერციალიზაციის გამართლებაა.
კამპანია საკმაოდ პრიმიტიულია და მისი გზავნილები გამოიყურება ასე 
ცდილობენ ეკო და სათავგადასავლო ტურიზმის ერთმანეთში აღრევას. როგორც ვიცით, ბუნების ძეგლების გასხვისება ნებადართულია მხოლოდ ეკოტურიზმის განვითარების მიზნით, ეკოტურიზმი კი გულისხმობს ტურიზმის ისე განვითარებას, ლანდშაფტს ხელშეუხებლობა რომ შეუნარჩუნდეს. ამავე დროს, ბალდაში ბუნების ძეგლი გასხვისდა, თუმცა მასზე როლერის ატრაქცია – ტროსები, ბეტონის მასიური ხიდები, ქვის კედლები, ბეტონის ბილიკები დაიგეგმა, რაც სათავგადასავლო ტურიზმთან უფროა ახლოს. სწორედ ამ აცდენის შერბილებას ცდილობს სააგენტო ზემოთ ნახსენები ცნებების აღრევით.
ცდილობენ მარტვილის კანიონი გამოიყენონ ბალდაში დაგეგმილი პროექტის გასამართლებლად, რაც წარმოუდგენელი ავანტიურაა. მარტვილში ვიზიტორები როლერის ატრაქციაზე სრიალის ნაცვლად, ნავებით ათვალიერებენ გარემოს, რაც იძლევა უდიდეს განსხვავებას როგორც იდეურად, ისე – ფუქციურად და ვიზუალურად.
ცდილობენ, ბევრჯერ ახსენონ შესაძლო “განვითარება”, სინამდვილეში კი ადგილობრივებს სთავაზობენ მხოლოდ მომსახურების სფეროში დასაქმებას. ცნობილია, რომ ამ სფეროში მოსახლეობის გამომწყვდება განუვითარებელ ან ნაკლებგანვითარებულ ქვეყნებს ახასიათებთ. მომსახურების სფეროს კრიტიკა შესაძლებელია მის ყველა ეტაპზე – დაწყებული საბანკო სესხის აუცილებლობიდან, დასრულებული ამ სფეროში დიასახლისების უმძიმესი და აუნაზღაურებელი შრომით, თუმცა ამაზე – სხა დროს. ყოველ შემთხვევაში, ცხადია, რომ არც ერთი ღირსეული, მდგრად განვითარებაზე ორიენტირებული გუნდი საკუთარ ხალხს მომსახურების სფეროს არ სთავაზობს ერთადერთ ალტერნატივად.
ცდილობენ, სააგენტოს ეფექტურ მუშაობაზე საუბრისას, მეტი დამაჯერებლობისთვის, ხშირად ახსენონ გერმანელი ექსპერტები. როგორც წესი, თუ სახელმწიფო ორგანოს ეფექტურობა რომელიმე კერძო ექსპერტმა ან ორგანიზაციამ იკვლია, დასკვნებზე საუბარს თან უნდა ახლდეს ამ ექსპერტებისა ან ორგანიზაციები დასახელებები ან კვლევის ლინკი. ამ შემთხვევაში, ჩვენი გერმანელი ექსპერტები მითიურ საბურველში არიან გახვეულები, რაც საკმაოდ არასერიოზულია და აჩენს კითხვებს როგორც მათ ნამდვილობასთან, ისე – კომპეტენციასთან დაკავშირებით.
ბალდის მოსახლეობა მოხსენიებულია “გარკვეულ ჯგუფად”, ხოლო ამ სოფელში დაგეგმილი პროექტი – უალტერნატივიდ, რაც ორგზის შეურაცხმყოფელია მათთვის, ვინც მენტალური და ფიზიკური ჯანმრთელობის ხარჯზე, კარავში დარაჯობს მოპარულ საკუთრებას.
სინამდვილეში, პროექტის ავკარგიანობა მარტივად განსაჭვრეტია. ხალხსითვის სასარგებლო საქმეები არ კეთდება ხალხისგან მალულად და ამ საქმეებზე მათ არ ელაპარაკებიან ხან პოლიციით, ხან კი დასპონსორებული კამპანიის გზავნილებით. ბალდის კანიონის შესანარჩუნებლად ბრძოლა ჩუმ-ჩუმად, მაგრამ გრძელდება 
✅სოციალური ქსელი – დათო სიმონია©