შინაგან საქმეთა სამინისტრო მართვის მოწმობის გამოცდებთან დაკავშირებით ახალ წესებს აამოქმედებს
შინაგან საქმეთა სამინისტრო სატრანსპორტო საშუალების მართვის უფლების მისაღები თეორიული და პრაქტიკული გამოცდის მიმართულებით ცვლილებებთან დაკავშირებით ოფიციალურ ინფორმაციას ავრცელებს.
თეორიული გამოცდა: 3 შეცდომის ნაცვლად 5 შეცდომა
უწყების ცნობით, B კატეგორიის მართვის უფლების მისაღებ თეორიულ გამოცდაზე კანდიდატს, სამი შეცდომის ნაცვლად, ხუთი შეცდომის დაშვების უფლება ექნება, რაც ნიშნავს, რომ გამოცდაზე მოცემული 30 შეკითხვიდან კანდიდატმა 25 სწორი პასუხი უნდა დააფიქსიროს.
რიგების გარეშე: პრაქტიკის მეორე ეტაპის დაჯავშნა ლოდინის გარეშე იქნება შესაძლებელი
ასევე, პრაქტიკული გამოცდის პირველი ეტაპის (მოედანი) წარმატებით ჩაბარებისთანავე, კანდიდატებს ეძლევათ შესაძლებლობა, პრაქტიკული გამოცდის მეორე ეტაპზე გასასვლელად სასურველი დრო ყოველგვარი ლოდინის გარეშე, სააგენტოს სტრუქტურულ ერთეულში დაჯავშნონ.
მარშრუტების ცვლილება გორსა და ბათუმში
ამასთან, შსს-ს ინფორმაციით, სატრანსპორტო საშუალების მართვის უფლების მისაღები გამოცდის პროცესის გაუმჯობესების მიზნით გორსა და ბათუმში მარშრუტების ცვლილება განხორციელდა.
პრაქტიკული გამოცდა: 14 მსუბუქი შეცდომის უფლება 15 ივნისიდან
კიდევ ერთი ცვლილება მიმდინარე წლის 15 ივნისიდან შევა ძალაში. არსებული წესით, B კატეგორიის სატრანსპორტო საშუალების მართვის უფლების მისაღები პრაქტიკული გამოცდის მეორე ეტაპზე მე-12 მსუბუქი შეცდომა ავტომატურად გამოცდის შეწყვეტას (მძიმე შეცდომას) ნიშნავს. ცვლილების ამოქმედების შემდგომ, კანდიდატს 14 მსუბუქი შეცდომის დაშვების უფლება ექნება, მე-15 შეცდომა კი გამოცდის შეწყვეტას გამოიწვევს.