ფეხბურთის ეროვნული ნაკრების მთავარი მწვრთნელი ვილი სანიოლი თბილისის საპატიო მოქალაქე გახდა.
დაჯილდოების ცერემონია სახელმწიფო ცერემონიების სასახლეში გაიმართა.
„მინდა წარმოგიდგინოთ ადამიანი საპატიო თბილისელის წოდებაზე, რომელმაც სრულიად საქართველოს შეაყვარა თავი. ის არ არის ქართველი, მაგრამ სულით, გულით, სისხლით, ხორცით, გაგებით არის ქართველი. ჩვენ, წლების განმავლობაში, მე როდესაც წინა ცხოვრებაში სპორტით ვიყავი დაკავებული, ხშირად მოგვიწია ერთმანეთის წინააღმდეგ ასპარეზობაც, თამაშიც. რა თქმა უნდა, ერთმანეთის მიმართ ყოველთვის გვქონდა განსაკუთრებული პატივისცემა და განსაკუთრებული სიყვარული. ის დღეს არის ჩვენი თანაგუნდელი. ის ჩვენთან ერთად ტიროდა რამდენიმე თვის წინ და ეს ცრემლები იყო სიხარულის, სიამაყის. ცრემლები იყო, რომელმაც სრულიად საქართველო გააბედნიერა და სიამაყე დაუბრუნა ქართულ ფეხბურთს, ქართულ სპორტს. მინდა საპატიო თბილისელის წოდებაზე წარმოგიდგინოთ ვილი სანიოლი“, – განაცხადა დედაქალაქის მერმა კახა კალაძემ.
