აშშ-ის საიმიგრაციო და საბაჟო აღსრულების სამსახურის (ICE) დაკავების ცენტრში საქართველოს მოქალაქე მამუკა ართმელაძე გარდაიცვალა. ინფორმაციას ABC News ავრცელებს.
გამოცემის ცნობით, 43 წლის მამუკა ართმელაძე 4 ივნისს, ლუიზიანის შტატში მდებარე უინის სასჯელაღსრულების დაწესებულებაში გარდაიცვალა.
ICE-ის ინფორმაციით, ართმელაძე უგონო მდგომარეობაში იპოვეს და ადგილობრივ სამედიცინო ცენტრში გადაიყვანეს, თუმცა მისი გადარჩენა ვერ მოხერხდა.
„გადაუდებელი სამედიცინო დახმარებისა და სიცოცხლის გადასარჩენად გაწეული ძალისხმევის მიუხედავად, დაახლოებით 23:22 საათზე ექიმმა მამუკა ართმელაძე გარდაცვლილად გამოაცხადა“, – ნათქვამია უწყების ოფიციალურ შეტყობინებაში, რომელიც, ABC News-ის ინფორმაციით, კანონმდებლებს გაეგზავნათ.
გარდაცვალების ოფიციალური მიზეზი ამ დროისთვის უცნობია და ის სასამართლო-სამედიცინო ექსპერტიზის დასრულების შემდეგ დადგინდება.
ICE-ის განცხადებით, ართმელაძე მიმდინარე წლის თებერვალში, ნიუ ორლეანში ჩატარებული ოპერაციის დროს დააკავეს. უწყების ცნობით, ოპერაცია მიმართული იყო კომერციული სატრანსპორტო საშუალებების მძღოლების წინააღმდეგ, რომლებიც საზოგადოებრივი უსაფრთხოებისთვის საფრთხედ მიიჩნეოდნენ.
„აშშ-ის საიმიგრაციო და საბაჟო აღსრულების სამსახურმა ართმელაძე მას შემდეგ დააკავა, რაც დადგინდა, რომ მას არ ჰქონდა შეერთებულ შტატებში კანონიერად დარჩენის უფლება“, – აცხადებენ უწყებაში.
ABC News-ის ცნობით, ICE-ის დაკავების ცენტრებში გარდაცვალების შემთხვევების ზრდა იმ ფონზე ფიქსირდება, როდესაც კანონმდებლები და მიგრანტთა უფლებების დამცველი ორგანიზაციები დაკავების პირობების გამო უწყებას სულ უფრო მწვავედ აკრიტიკებენ.
გამოცემის ინფორმაციით, მამუკა ართმელაძე 50-ე ადამიანია, რომელიც აშშ-ის პრეზიდენტ დონალდ ტრამპის ადმინისტრაციის მეორე ვადის პერიოდში ICE-ის პატიმრობაში გარდაიცვალა.